هو ولد الجهة ، تربى في نوار بوزقام وربيعها، وكبر بصوتو حتى ولى واحد من الأسماء الفنية في الجهة ، أسس فرقة سمر للموسيقى ، بعدها كبر و كبر الحلم متاعو، لين صار نجم معروف في المنستير والساحل كامل.
بحري سمعلي… الفنان، الإبن البار، وصاحب “الأخلاق والمحبة” كما يلقبوه الناس.
من بوزقام انطلق الحلم
بحري ما جاش للفن بالصدفة. جا بالصوت، بالموهبة، وبالخدمة. بدأ يغني في الأعراس والسهرات المحلية، وصوتو وصل. اليوم عندو رصيد كبير من الأغاني الخاصة اللي ولّت تتغنى في الديار والسيارات وفي كل سهرة ساحلية.
أغانيه فيها نكهة الجهة، وفيها لهجة الناس البساط، وفيها إحساس يوصل للقلب طول.
تعاونات كبار و حضور مميز
بحري ما وقفش هنا ، غنى مع كبار، المثال ارمستا وغيرو برشا من فنانين توانسة. الحضور متاعو على المسرح ديما مختلف: متواضع، قريب من الجمهور، ويغني من قلبو قبل حنجرتو.
علاقاتو مع الفنانين الكل طيبة، وهذا علاش الكل تحبو وتحترمو.
بحري… الأخلاق قبل الصوت
اللي يعرف بحري عن قرب يقولك كلمة وحدة: “ولد أصل”.
عمرو ما تكبر، عمرو ما نسى ناسو . ديما حاضر في المناسبات الخيرية، ديما يضحك، وديما كلمتو طيبة. المحبة اللي يعطيها للناس رجعتلو أضعاف من جمهور تونس الكل .
اليوم بحري سمعلي ولى علامة. علامة على أنو الفنان ينجم ينجح بأخلاقو، بتواضعو، وبصوتو …و بحري نجح.
بحري سمعلي… صوت من بوزقام وصل للساحل الكل، ومازال ماشي ويعلى
