عرفت الشيعة قبل ما شوفهم، عرفتهم عَمقعد خشب،
بالمدرسة، بالكُتب، بِصدى الخطّ، بحِكَم عَلي،
بنهج بلاغة علي.
عرفتهم بالحُسين، بالمَظلومية وبعزّة النفس.
عرفتهم بِكَرم ورثوه بالجينات،
كُرما هنّي كُرما بأرزاقهم، بمشاعرهم،
كُرما هنّي كُرما،بروحهم حتى الموت
ما طلبت مساعدة من شيعي وخُذلت،
ما دخلت بيت شيعي الّا ودُلّلت وعُزّزت
يا رفقات، يا عِيل القلب،
قلبي عم يِنشِوي، عَباب كان مفتوح إلنا
عسفرة لمّتنا،عخبز طالع من الفرن
علقمة من نفس الصحن، لقمة لقمة
عحَكي، عضحك،عإيّام كانت إلنا
عَبيوت كانت تشبهنا
ويلّي بيذبح هو العجز
العجز بأنّك مش قادر تساعد مليون
كيف بتساعد شي مليون عيون وقلب، وأكتر؟
ومنسأل إنتو مناح؟
كيف منسأل حدا اذا منيح وهو ضيّع بيتو؟
كيف منسألو اذا بأمان وهو فلّ
فلّ وحامل على ضهرو فَرشة وحرام ،
حامل على ضَهرو وَلَد ووَطن،
كيف منسألو اذا بخير وهو صاحب أرض صار نازح بوَطنو،
يا ريت قادرة عمرلكم حيطان تْساعْكم
يا ريت قادرة عَمرّلكم سَما تْردّ عَنكم الزَعَل 💔😭
الضاحية_الجنوبية #لبنان #بيروت
